RSS Feed

Monthly Archives: June 2013

القصيدة الآيتيتية

الكود فاقع

والسايت واقع

و أنا مش سامع صوت الbugs ***

شغلي مطبّل

عمره ما بكمل

وانا متأمل يخلص “دَزّ” ***

بزّق و لزّق

اوعا تدقق

لو متخزق ما تنهزّ ***

طُخ الsystem

خرّب و هدّم

بس ما تحلم ييجي الحظ ***

IE مكيّش

 Safari مطنّش

Chrome مكرّش بعطيك “Oops” ***

دوامك بطوَل

وجهك بهزَل

جسمك بتقل، وضعك لوز ***

….

Error بيطلع Error بينزل

System كامل فجأة بيزعل

جرّب سوّي… حاول تعمل…

فجأة بيزبط و بتتساءل:

ليش كان ضارب و كيف انحلّ!!!

….

الـClient مشوّش و محيّر، كل يوم طلباته بتتغيّر

الـTeam Leader راسه اتفجّر

الـManager ضايج و  مدمّر

وإنت إلك إنك تتصوّر:

الكل قاعد فيك بستنّا، والكل عينُه عليك بتنظر.

ما تتأثّر.

….

الـmeetings ع مدار اليوم، شغالة و الكل مهموم

وهدفها واضح و مفهوم..

كلهم بلقو عليك اللّوم

مفروض طول اليوم ما تقوم،

وعالـcode لازم تعمل zoom،

من الشاي و القهوة محروم،

لحد ما هالشركة تكبر و صاحبها يصير و يتصوّر

وانت يقولو عليك: مرحوم.

وإذا قررت بيوم تعطّل و اتريّح حالك و تدلّل

رح  تبدا تلحّن و تموّل:

انك رايح عالمستشفى و بدك قولونك تستأصل،

او انها أمك تعبانة او مسافرة او حتى حامل،

او محتاج لختم ورقة ولازمك يوم عليه تتشعتل،

وبالآخر ما رح يقتنعوا و لا رح يعطوك الapproval

و ظروفك وحدك إتحمّل!

لما بتيجي يوم تعبان و متنكّد و حالك قرفان

بحكولك لازم تتبسّم و تتفاءل و تضل فرحان

ولما بتيجي يوم مبسوط و مزاجك رايق و مزبوط

بحكولك على شغلك ركّز و ارجع متدايق و مجلوط

طبعاً إذا روّحت عالسبْعة بتكون مروّح بكير

و إذا جيت تاني يوم متأخر تُلت ساعة، شو هالتقصير!

بتستقبل أحلى تحذير و بتعرف إنه الله كبير

و إذا يوم كان في عندك Build إنسا المخدّة و السرير

و إذا كان عندك Bug متنّح بتداوم قبل الصراصير

و آخر شي لما بتتقيَّم بحكولك: “صحّي الضمير”

*إهداء: إلى كل شخص آثر حياة البرمجة على الحياة الدّنيا.

و للمعاناة بقيّة… 

Advertisements