RSS Feed

هل أنا مُحجَّبة؟

الحجاب .. هالقضية المعقدة اللي كل يوم بطلع فيها فتوى و رأي، و كل يوم بدور عنها نقاش في كتير أوقات بتكون نهايته مش واضحة أبدا!!

شو هو الحجاب؟ و شو الغاية منه؟ هل عنجد بختلف حكمه من مكان لمكان؟! يعني الحجاب في السعودية غير عن الأردن غير عن أميركا؟!

الحجاب قيد ولا حرية؟ مصدر غلبة و تعب ولا راحة و أمان؟

و السؤال القوي (على رأي أبو الغور) .. هل أنا محجبة؟ وكيف بعرف ازا كان لباسي عبارة عن حجاب صحيح أو لأ؟!

صراحة .. لما قررت أكتب عن الموضوع قلت خليني أقرأ شوي و أعرف كل آراء العلماء و المفتين، بس بعدين غيرت رأيي و قررت أكتب الشي اللي بفكر فيه و بحس انه صح .. ببساطة!

لذلك .. هاد الحكي كله هو عبارة عن رأيي الخاص و المتواضع جدا، و هو أكيد أكيد مش فتوى ولا علم!

شروط الحجاب في الاسلام كلنا بنعرفها و حافظينها بصم -مش متزكرة بأي صف أخدناها .. بس أخدناها- وهي أنه يكون مش ضيق، ومش شفاف و ساتر للعورة، و عورة المرأة هي كل جسمها الا الوجه و الكفين!

هاد بالنسبة للمدرسة، بس بالنسبة للبيت الوضع مختلف شوي .. بالبيت ازا في رجّال غريب و بدك تطلعي قدامه بقولولك: حطي ع راسك! يعني لو كنتي لابسة نص كم و حاطة ع راسك .. عادي! و لو كانت رقبتك مبينة بس مغطية شعرك .. كمان عادي!

مع انه ايديكي و رقبتك بالزبط متل شعرك!

وبما إنه مجتمعنا محكوم بالعادات أكتر من الدين، اتعودنا انه الحجاب هو غطاء الرأس يعني المنديل أو الإشارب أو الشال!

و هون بلشت المشكلة اللي تحولت فيما بعد لمصيبة!!

من زمان هاي الأفكار و العادات موجودة، و من زمان النساء بلبسو قمصان و بنطلونات مع حجاب (إشارب) بس عمره ما حدا حس انه الوضع مأساوي و كتير غلط متل هلأ!

اشي طبيعي .. الموضة بتتقلب و بتتغير، و صناع الموضة بدهم يوصلو لكل فئات المجتمع، بالأول كان الجينز واسع نوعا ما ولما ركّبو عليه الحجاب مش كتير فرق عن بنطلون القماش .. بس بعدين صار الجينز أضيق و أضيق .. و مع هيك ضل الحجاب مركب فوقيه!

المصيبة انها الموضة أحيانا بتكون مطابقة تماما لأشياء محرمة و واضحة في الدين .. و مع هيك للأسف بتنتشر بسرعة و بقوة بين البنات المسلمات!! والمثال اللي بحب أذكره هون عشان ازا مش عارفين أو مش منتبهين هو هاد الاشي اللي ببقا منفوخ فوق الراس تحت الحجاب و اللي كلنا عارفين انه مش شعر!! و ورد فيه حديث صريح و خطير:

“صنفان من أهل النار لم أرهما: قوم معهم سياط كأذناب البقر يضربون بها الناس، ونساء كاسيات عاريات مائلات مميلات، رؤوسهن كأسنمة البخت المائلة، لا يدخلن الجنة ولا يجدن ريحها، وإن ريحها ليوجد من مسيرة كذا وكذا”

بقولو انه نسبة التعليم زادت و نسبة الجهل و الأمية قربت تنعدم، و بقولو اننا بلشنا نتحرر و نتخلص من كتير عادات و تقاليد خاطئة في مجتمعنا، بس مو ملاحظين معي انه بالنسبة لموضوع الحجاب نحنا عم نتمسك بجهلنا أكتر؟ وعم نتخبى ورا عاداتنا الخاطئة أكتر و أكتر؟؟

الحجاب هو فريضة، و عبادة و أحد الشرائع اللي المرأة المسلمة مكلفة فيها؟ أكيد!

بس كلنا بنعرف انه الفرائض و الطاعات اللي الله أوجبها علينا كلها كانت لحكم و غايات معينة، و لما نحنا نفهم هالحكم بنأدي طاعاتنا بقناعة و حب، و بنبطل نتذمر منها!

الحجاب هو اللي بحجب عنا الأذى و الخطأ، لأني محجبة أنا قوية – قدرت أتغلب على نفسي و أخفي جمالي بس عشان أرضي ربي!

لأني محجبة أنا ما بسلم عالرجال – بما اني غطيت جسمي عشان ما يشوفوه أكيد ما رح أخليهم يلمسوه!

لأني محجبة أنا حرة – بدرس، بشتغل، بتنقل بكل ثقة .. لأني عارفة اني مهما تواجدت بين الرجال ما رح أتسبب بالإثم لا لنفسي ولا الهم.

الحجاب بغلّب؟ كتير! بس ليش نحنا مستعدين نتحمل غلبة الكعب ابو 10 سنتيميتر و أكتر عشان نكون أنيقات بس مش مستعدين نتحمل غلبة الحجاب عشان نحمي مجتمع كامل من الغلط و نرضي رب العالمين؟!

الحجاب بشوّب؟ يا حبيبي بالصيف! بس على فكرة نحنا بنقدر نصوم بالشوب، و نروح عمرة بالشوب، و أوقات نحنا نفسنا بنستغرب من قدراتنا على الصبر و التحمل، وبالعكس بنفرح كتير لما نحس حالنا بنحارب لحتى نقوم بالطاعة ..

و الحجاب ما بقل أهمية عن هاي الطاعات .. و بعدين بالمنطق .. لو الجنة سهلة و رخيصة كان كل الناس دخلوها بس الجنة غالية كتير و ثمنها أكيد بدو يكون غالي .. الله يكرمنا و يجعلنا من أهلها .. آمين.

يا ترى لو كلنا فهمنا أبعاد الحجاب الدنيوية و الدينية كان لسة في حدا بفكر انه الحجاب هو مجرد قطعة قماش بنلفها على شعرنا؟!

بعرف اننا بنحب اللبس و الموضة -أنيقات من يومنا ;)- وبالنسبة الي أحلى منظرين ما بمل منهم أبدا: الطبيعة و محلات الأواعي! 😛 بس بدل ما نرضى و نرضخ لكل شي بنفرض علينا ليش ما نتعلم مهارة الانتقاء، في شي مناسب لتعاليم ديننا بنقبله و بنلبسه، وفي شي مو مناسب .. ببساطة بنرفضه.

بالنسبة للسؤال القوي، هل انتي محجبة فعلا؟ ما حدا بقدر يجاوب الا انتي.. ولا شيخ ولا عالم ولا مفتي … ازا كنتي ماشية بالشارع ومستشعرة انه ربك شايفك و واثقة انه راضي عن لباسك … كملي بطريقك ولا يهمك.

*عشان ما تفهموني غلط:

– هاد الحكي بوجهه أول شي لحالي! أنا ما بعتبر انه لباسي كامل و حجابي صحيح .. أبدا .. بس بحاول كل لما أنزل عالسوق أختار شي أحس اني بقترب فيه من الشي الصح 100% .. و الله يوفقنا

– هلأ انتبهت اني كتبتها بالعامية .. بس أحسن .. هي فكرة صغيرة و حبيت أوصلها بدون فلسفة و فصحنة .. فسامحونا.

و بس! 🙂


Advertisements

About Yasmin Badran

Software Developer

14 responses »

  1. Haitham Al-Sheeshany

    ياسمين
    I stole this and put it n my blog!
    Hope that`s ok
    🙂

    Reply
    • شكرااا هيثم 🙂
      بالعكس ان شالله يكون الشي الي كاتبته فيه خير و منفعة و حدا يستفيد منه
      و شرف الي انك تنشرها على مدونتك
      😀

      Reply
  2. Pingback: الحجاب – من مدونة scent of Jasmine « Observations of a tired sOul.

  3. ضربتي ع وتر قصه عم نتداولها كتير

    وخصوصي مع موضه الفيزون على جاكيت قصير وحجاب
    مش بحكيلهم إنه إشحلوه أحسن,, بضل أحكيلهم طولي الجاكيت شوي,, و وسعي فيزونك شوي

    خلينا نقول إنه أنا كمان مش راضيه عن وضع حجابي
    بس بحاول أحسنه دايمن
    ولو حسيت إني غلطت بلبسه, وماريحتني وأنا طالعه
    مابعيدها أكيد

    بسلمش ع رجال,, وهاي العاده إكتسبتها بالنظر قبل التعليم
    إمي ما كانت تسلم على حدن من رجال العيلة
    ف عملت متلها وبعدين فهمت شو يعني وليش يعني

    الحجاب ما بذايق
    معظم كوابيسي بتكون إني بحلم إني طالعه وناسيه البس ع راسي
    هاد أفظع كابوس بحلم فيه ,, وبصحى وأنا مجنونه
    والحمدلله أنا محجبه ,, وحره

    Reply
    • شكرا كتييير على مرورك و رأيك 🙂

      هلأ “اشلحيه أحسن” مش عشان تشلحه بس لأنه ما عاد اله داعي و بطل يأدي الغرض المطلوب، بالعكس صار يلفت النظر أكتر!
      بس أكيد ما حدا بتمنى انها تشلحه أد ما إنها تفهمه و تحترمه.

      بالنسبة للسلام أو المصافحة صراحة انا ما كنت حاسة بخطورة الموضوع لحد ما سمعت هاد الحديث:
      “لأن يطعن في رأس أحدكم بمخيط من حديد خير له من أن يمس امرأة لا تحل له ”
      سبحان الله .. في كتير شغلات بنستهين فيها عن جهل بس الحمدلله انه اول ما نعرف بنلتزم
      المصيبة انه هالايام السلام صاير يتعدى المصافحة بمراحل!!
      الله يهدينا للصواب يا رب

      حبيت كوابيسك 😛
      ان شالله ما بتعدى كونه حلم مزعج

      وأكيد نحنا أحرار بديننا .. نحن قوم أعزنا الله بالإسلام .. الحمدلله 🙂

      Reply
      • العفو الشكر إلك

        أنا متابعه مدونتك من فتره,,ومش متأكده بس كإني رديت عليكي ف موضوع

        في أشياء كتير بنتلقاها من اللي حولينا ومنفكرش فيها إنه إلها منحنى ديني

        بتوقع لو اهل هالصبايا علموهن معنى الحجاب الصح ما كان هالحكي صار
        في ضوابط وفي أشياء الواحد لازمن يختصرها عشان ميلفتش النظر أكتر

        تحبك العافيه,, الله يبعد كوابيسي عنك لووول

        الشكر إلك مره تانيه,,

  4. رائع ياسمين..كتير عجبني وصفك..و كيف حكيتي عن ليش انا محجبه. عن جد لبس البنات هالايام بخزي..
    لابسين و مش لابسين …و بعدين مغطيين روسهم
    انا كمان زيكم حجابي مو كامل بس مو على الموضه و لا بلبس ابو نفخه و لا بحط مكياج بس بدو تزبيط كتير لسا
    شوفو هاي الصورة كتير معبره.. و الموضوع
    dear sisters hijab is so just more than covering your head

    http://www.ma3zoom.com/ma3zoom/2011/12/dear-sisters-hijab-is-so-just-more-than-covering-your-head/
    ربنا يهدينا و يسامحنا و يهدي الجميع..:)

    Reply
  5. I absolutely loved your post. Although it took me a while to read it because it was in Arabic, I was cheering you on from the first few words.
    I wish more and more Muslim women would write about the importance of the hijab. I’ve posted about hijab but unfortunately, people were offended by it.
    Sorry I couldn’t comment in Arabic, that would take me forever, but I hope you can understand or maybe translate my words.

    Reply
    • Oh my God! you translated this post?!!
      I’m really sorry I didn’t write it in standard Arabic, of course this made the translation process much harder!! :S

      I’m so glad you liked it after all! 🙂

      Yes, we need to write and talk more about hijab and other religious issues that we forgot the real reason why they were legislated in the first place!

      I’d love to read what you wrote about hijab, if you can send me some link?

      And please, feel free to comment in the way you like! 🙂

      Reply
  6. Well, I didn’t translate the page, it just took me a while because I’m not a fast reader when it comes to the Arabic language. I never had the privilege to read and write in Arabic because I was raised in America, so I had to teach myself.
    Anyways, if you would like to visit my blog, here are a few of the posts I have on the hijab:

    http://yemenia68.wordpress.com/2009/10/20/the-hijab-controversy/
    http://yemenia68.wordpress.com/2009/04/21/why-do-women-fear-the-hijab/
    http://yemenia68.wordpress.com/2009/02/08/stereotyping-the-hijab/
    http://yemenia68.wordpress.com/2009/01/12/the-arab-american-hijab/

    Reply
  7. وصول للمضمون بطريقة جميلة
    و على نمط … و شهد شاهد من أهلها
    🙂 أقصد من بنات آدم …
    جزاك الله خيراً
    و نفع بك و بمقالتك المسلمات و المسلمين

    Reply
    • شكرا شكرا بشّار .. سعيدة بمرورك 🙂

      والله أتمنى أن إنه يكون فيها منفعة لأي بنت لأني متأكدة إنه هاد هو الخير الها و للمجتمع كاملا
      الله يهدينا للصواب دائما

      Reply

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: